Манчаары Баһылай аатынан саха төрүт көрүҥнэрин Республикатааҕы киинин коллектива

балаҕан ыйын 15 күнүгэр көҥүл тустууга Саха АССР үтүөлээх тренерэ, ССРС спордун маастара

Николай Иванович Сафонов-Дьырылы

ыарахан ыарыы кэнниттэн 89 сааһыгар бу күн сириттэн букатыннаахтык барбытын туһунан иһитиннэрэр уонна кини тапталлаах кэргэнигэр Раиса Елизаровнаҕа, оҕолоругар уонна сиэннэригэр, доҕотторугар уонна үөрэнээччилэригэр дириҥ кутурҕанын тиэрдэр.

Николай Иванович улуу тренер Д.П.Коркинныын 1977-1984 сс. бииргэ үлэлээбитэ, учуутал, суруйааччы уонна поэт, Аар Дархан оһуохай этээччи уонна олоҥхоһут, тойуксут уонна алгысчыт.

Кини сэттэ кинигэни суруйан таһаарбыта, сүрүннээн хоһооннор, кэпсээннэр уонна олоҥхо киирбит хомуурунньуктара. «Түөрэхтэһии» диэн көҥүл тустууга бэйэтин санааларын, үлэтин уопутун суруйбут кинигэтэ 2013 с. тахсыбыта уонна тренердэргэ, бөҕөстөргө туһуланар.

Николай Иванович 1987 сылтан саҕалаан республикаҕа ыытыллар оһуохай этээччилэр уонна олоҥхоһуттар күрэхтэригэр уонна фествалларыгар өрүү кыттара, Туймаада ыһыаҕын «Аар Дархана» (1993) уонна Олоҥхо түһүлгэтин кыайыылааҕа (2005), Олоҥхо VII республикатааҕы фестивалын Гран-притын уонна Ньурбаҕа ыытыллыбыт Олоҥхо Ыһыаҕын кыайыылааҕа (2012). Монголияҕа (1979), Германияҕа, Францияҕа, Швейцарияҕа уонна Италияҕа (1987), Болгарияҕа (1989) саха фольклорун дьоһуннаахтык билиһиннэрбитэ.

Кэнники сылларга республикатааҕы хаһыаттарга ыстатыйалары тиүигин быспакка суруйара, ааҕааччылар биһирэбиллэрин ылара. “Дьулурҕан” уонна “Спорт Якутии” хаһыаттарга көҥүл тустуу туһунан өрүү суруйара, улахан күрэхтэһиилэр кэннилэриттэн саха бөҕөстөрө хайдах тустубуттарын туһунан үрдүк таһымнаах ырытыылары оҥороро, хас биирдиилэригэр сыаналаах сүбэлэри биэрэрэ, итэҕэстэрин ыйара. “Туймаада” хаһыакка кэнники кэмнэргэ түөрт уонна икки строкалаах киэҥ өйдөбүллээх хоһооннору таһаарара, бу кини айар дьоҕурун чыпчаала буолбута.

Үрдүкү спортивнай маастарыстыба оскуолатыгар уонна Р.М.Дмитриев аатынан Республикатааҕы Олимпийскай эрэллэр училищеларыгар бэйэтин баҕа өттүнэн кэлэн, тренердэргэ уонна эдэр бөҕөстөргө анаан көрсүһүүлэжри ыытара, бэйэтин үлэтин уопутугар уонна улуу тренер Д.П.Коркин тустууктары бэлэмниир ньымаларыгар олоҕуран сүбэ-ама биэрэрэ, республика сүүмэрдэммит хамаандатын чилиэннэригэр туһааннаах консультациялары оҥороро.

Саха сирин спордун биир уҕараабат санаалаах энтузиаһа, көҥүл тустуу уһуйааччыта олохтон барда, ол эрээри кини туһунан үтүө өйдөбүл умнуллуо суоҕа…