Ыам ыйын 25-26 күннэригэр Нам улууһун киинигэр стадиоҥҥа «Дыгын оонньууларыгар» кыттарга иккис сүүмэрдиир түһүмэх ыытылынна. Алта путевка иһин Саха сирин араас муннуктарыттан 49 уол илин-кэлин түсүһэ кэлбит. Уйбаан Белолюбскай салайар «Боотур» кулуубуттан 13, ЧИФКИС-тэн 6 кыттааччы баар. Улуустарынан бардахха, Мэҥэ Хаҥаластан, Хаҥаластан, Намтан, Орто Халыматтан, Чурапчыттан, Уус Алдантан, Ньурбаттан, Бүлүүттэн, Кэбээйиттэн, Өлүөхүмэттэн, Амматтан, Үөһээ Бүлүүттэн, Томпоттон, Өлөөнтөн уо.д.а. кэлбиттэр.

Икки күннээх сэттэ көрүҥнээх күүстээх эрийсии түмүгэр кыайыылааҕынан Чурапчы Одьулуунуттан төрүттээх Петр Старостин кыайыылаах таҕыста. Петр сэттэ көрүҥтэн түөрдүгэр бастаата («үс төгүл үскэ»  — 5, тутум эргииригэр — 1, мас тардыһыытыгар — 13, оҕунан ытыыга — 1, сүүрүүгэ — 1, хапсаҕайга — 5, тааһы көтөҕүүгэ —1).

«Дыгын оонньууларыгар» кыттар быраабы ыллылар:

Алексей Протодьяконов — 82 очукуолаах (Томпо);

Айсен Семенов — 67 очукуолаах (Өлөөн);

Алексей Иванов — 60 очукуолаах (Үөһээ Бүлүү);

Леонид Филиппов — 50 очукуолаах (Амма);

Артем Варданян — 38 очукуолаах (Нам);

Петр Старостин — 27 очукуолаах (Чурапчы).

Бу састаапка баар уолаттар Алексей Протодьяконовтан ураты бары эрдэ «Дыгын оонньууларын» финалыгар кытта сылдьыбыттара. Сүүмэрдээһиҥҥэ алтыс путевканы ылбыт Алексей Томпо Кириэс Халдьаайытыттан төрүттээх эбит. Кини күрэхтэһии туһунан саналарын үллэстэр:

— Тохсус кылааска үөрэнэ сылдьан «Дыгын оонньууларын» көрбүтүм, оччолорго Иван Белолюбскай кыайбыта. Ону көрөн бу күрэхтэһиигэ кыттыахпын баҕарар эбиппин диэн сыал туруоруммутум. Сүүмэрдиир түһүмэххэ кытта кэлбит хас биирдии уол маннык сыаллаах-соруктаах кэлэр буоллаҕа. Мин сүүмэрдиир түһүмэхтэргэ 2016 сылтан кыттабын. Хайаан даҕаны киирсиэхтээхпин, сүүмэрдээһини ааһыахтаахпын диэн сыал туруоруммутум уонна, төрүкү даҕаны, «Дыгын оонньууларыгар» кыттар улахан баҕа санаам буолар. Быйыл бастакы сүүмэрдээһиҥҥэ эмиэ кыттыбытым, ахсыс буолбутум. Онно бэйэм дьарыктанан кыттыбытым, онтон бу кэлин Денис Заболоцкай бырагырааматынан эрчиллэн саҕалаатым. Биир даҕаны көрүҥҥэ мэтээл ылбатым, саамай чугаһаппытым диэн сүүрүүгэ төрдүс буоллум. Оскуолаҕа сылдьан мас тардыһар этим, билигин ордук сүүрүүм уонна ыстаҥам табыллар дии саныыбын. «Дыгыҥҥа» диэри тутуммар уонна хапсаҕайбар өссө эбиэхпин наада эбит дии санаатым. «Дохсуҥҥа» инструкторынан үлэлиибин, ХИФУ юридическэй факультетын бүтэрбитим.

Финалга кыттар уолаттарга саҥа аат өссө Алексей Уваровскай баар. Алексей быйылгы Саха сирин многоборьетын чөмпүйэнээтигэр тутум эргииргэ икки мүнүүтэ иһигэр 71-дэ эргийэри ситиспитэ. Кини быйылгы «Дыгын оонньууларыгар» бастакы сүүмэрдээһини ааһан, путевка ылбыта.

 

Источник: edersaas.ru